Xocalı Soyqırımı 26 fevral 1992-ci ildə Qarabağ münaqişəsi zamanı Ermənistan silahlı qüvvələri tərəfindən Azərbaycanın Xocalı şəhərində törədilmiş kütləvi qətliamdır. Rəsmi məlumatlara əsasən, 613 mülki şəxs – o cümlədən 63 uşaq, 106 qadın və 70 qoca amansızlıqla qətlə yetirilmişdir. Yüzlərlə insan yaralanmış, 1275 nəfər əsir götürülmüş, bir çox ailə tamamilə məhv edilmişdir. Bu faciə beynəlxalq hüquqa görə müharibə cinayəti və insanlığa qarşı cinayət kimi qiymətləndirilir. Xocalı qurbanlarının xatirəsi hər il 26 fevral tarixində ehtiramla yad edilir.